واشنگٹن: ٹرمپ کا اسرائیل کو دوٹوک پیغام، مغربی کنارے کے انضمام کی اجازت نہیں
اردو ٹریبیون (لاہور ڈیسک)
امریکی صدر ڈونلڈ ٹرمپ نے اسرائیل کو واضح پیغام دیتے ہوئے کہا ہے کہ وہ مغربی کنارے کے کسی بھی انضمام کی اجازت نہیں دیں گے۔ اوول آفس میں صحافیوں سے گفتگو کرتے ہوئے صدر ٹرمپ نے کہا کہ “اب بہت ہو چکا ہے، یہ سلسلہ رکنا چاہیے۔”
ٹرمپ نے بتایا کہ انہوں نے اسرائیلی وزیراعظم بنیامین نیتن یاہو سے براہ راست بات کر کے اپنا مؤقف واضح کر دیا ہے۔ امریکی میڈیا کے مطابق صدر ٹرمپ نے اقوام متحدہ کی جنرل اسمبلی کے موقع پر عرب رہنماؤں کو بھی یقین دہانی کرائی ہے کہ وہ اسرائیل کے انضمامی منصوبوں کے مخالف ہیں۔
رپورٹس کے مطابق حالیہ دنوں میں اسرائیلی حکام نے عندیہ دیا تھا کہ حکومت مغربی کنارے کے کچھ حصوں پر قبضے کی سمت بڑھ سکتی ہے۔ تاہم صدر ٹرمپ نے اسے علاقائی استحکام کے لیے خطرناک قرار دیتے ہوئے کسی بھی صورت قبول نہ کرنے کا اعلان کیا۔
امریکی خصوصی ایلچی برائے مشرقِ وسطیٰ اسٹیو وٹکوف نے بھی تصدیق کی کہ صدر ٹرمپ کی عرب رہنماؤں سے ملاقاتیں مثبت رہیں اور توقع ہے کہ غزہ میں جاری جنگ کے خاتمے کی کوششوں میں جلد پیش رفت ہو سکے گی۔
