سعودی ولی عہد اور وزیر اعظم شہزادہ محمد بن سلمان نے بدھ کو جدہ میں یوکرین کے صدر ولادیمیر زیلنسکی کا خیرمقدم کیا ہے۔
سعودی سرکاری خبر رساں ایجنسی ایس پی اے کے مطابق ملاقات میں دونوں دوست ملکوں کے درمیان دو طرفہ تعلقات کا جائزہ اور یوکرینی بحران کی صورتحال پر تبادلہ خیال کیا گیا۔
سعودی ولی عہد نے بحران کے حل کے لیے تمام بین الاقوامی کوششوں کے حوالے سے مملکت کی خواہش اور حمایت کا اعادہ کیا۔ بحران کے نتیجے میں انسانی اثرات کو کم کرنے کے طریقوں پر بات چیت کی۔ یوکرینی صدر نے ممملکت کا دورہ کرنے اور سعودی ولی عہد سے ملاقات پر خوشی کا اظہار کیا۔
اس موقع پر سعودی وزیر توانائی شہزادہ عبدالعزیز بن سلمان، نیشنل گارڈ کے وزیر شہزادہ عبداللہ بن بندر بن عبدالعزیز، وزیر دفاع شہزادہ خالد بن سلمان، وزیر خارجہ شہزادہ فیصل بن فرحان، وزیر مملکت، کابینہ کے رکن اور قومی سلامتی کے مشیر ڈاکٹر مساعد بھی موجود تھے۔ یاد رہے یوکرین کے صدر ولادیمیر زیلنسکی بدھ کو سرکاری دورے پر سعودی عرب پہنچے تھے۔
جدہ کے کنگ عبدالعزیز انٹرنیشنل ایئرپورٹ پر مکہ ریجن کے نائب گورنر شہزادہ سعودی بن مشعل بن عبدالعزیز نے ان کا خیر مقدم کیا۔
