پاکستان: پی آئی اے کو برطانیہ کیلئے براہ راست پروازوں کی اجازت مل گئی

اردو ٹریبیون (لاہور ڈیسک)

قومی ایئر لائن (پی آئی اے) کو برطانیہ کے لیے تھرڈ کنٹری آپریٹر (ٹی سی او) کی باضابطہ منظوری مل گئی ہے، جس کے بعد برطانیہ کے فضائی آپریشن کی راہ ہموار ہو گئی ہے۔ ترجمان پی آئی اے کے مطابق آئندہ ماہ سے براہ راست پروازوں کا آغاز کیا جائے گا۔

پہلے مرحلے میں مانچسٹر کے لیے پروازیں شروع کی جائیں گی، جس کے بعد برمنگھم اور لندن کو بھی نیٹ ورک میں شامل کیا جائے گا۔ اس حوالے سے گزشتہ روز برطانوی محکمہ ٹرانسپورٹ نے باضابطہ طور پر پی آئی اے کو آگاہ کرتے ہوئے پانچ سال کے لیے سرٹیفکیٹ جاری کیا۔

مزید بتایا گیا ہے کہ پی آئی اے کو جامع اور ہمہ جہتی منظوری دی گئی ہے جس کے تحت قومی ایئر لائن نہ صرف مسافروں کو لے جائے گی بلکہ کارگو سروس بھی فراہم کرے گی۔ اس کے ساتھ ساتھ برطانوی محکمہ ٹرانسپورٹ نے سیکیورٹی اور کارگو کے لیے بھی پانچ سالہ ACC3 سرٹیفکیٹ جاری کیا ہے، جو بین الاقوامی اداروں کی جانب سے پی آئی اے کے فضائی آپریشنز اور سیکیورٹی پر اعتماد کا اظہار ہے۔

سی ای او پی آئی اے نے وزیر اعظم پاکستان، نائب وزیر اعظم، وزیر دفاع، وزارت دفاع، سول ایوی ایشن اور دیگر اداروں کی سرپرستی اور تعاون پر خصوصی شکریہ ادا کیا۔ انہوں نے پی آئی اے کی اس ٹیم کو بھی سراہا جس نے گزشتہ پانچ سالوں میں متعدد آڈٹس کا سامنا کرتے ہوئے کامیابی حاصل کی۔