پاکستان: خیبرپختونخوا اور پنجاب میں طوفانی بارشوں کی پیشگوئی، پی ڈی ایم اے کا الرٹ جاری

اردو ٹریبیون (لاہور ڈیسک)

محکمہ موسمیات نے خیبرپختونخوا اور پنجاب کے مختلف اضلاع میں طوفانی بارشوں کی پیشگوئی کرتے ہوئے متعلقہ اداروں اور شہریوں کو الرٹ رہنے کی ہدایت کی ہے۔

محکمہ موسمیات کے مطابق خیبرپختونخوا میں آج سے 7 اکتوبر تک بارشیں متوقع ہیں جبکہ پنجاب کے بیشتر اضلاع میں 5 سے 7 اکتوبر تک شدید بارشوں کا امکان ظاہر کیا گیا ہے۔

پنجاب ڈیزاسٹر منیجمنٹ اتھارٹی (پی ڈی ایم اے) نے صوبے کے بالائی علاقوں میں بارشوں کا الرٹ جاری کرتے ہوئے کہا ہے کہ ان بارشوں کے باعث دریاؤں اور ان سے ملحقہ ندی نالوں میں پانی کے بہاؤ میں اضافہ ہوسکتا ہے۔

ڈی جی پی ڈی ایم اے عرفان علی کاٹھیا نے تمام کمشنرز اور ڈپٹی کمشنرز کو الرٹ رہنے کی ہدایت کی ہے۔ ان کا کہنا تھا کہ ضلعی انتظامیہ، محکمہ صحت، آب پاشی، لوکل گورنمنٹ اور لائیو اسٹاک سمیت تمام ادارے فیلڈ میں موجود رہیں تاکہ کسی بھی ایمرجنسی صورتحال سے بروقت نمٹا جا سکے۔

انہوں نے شہریوں کو مشورہ دیا ہے کہ آندھی اور طوفان کے دوران محفوظ مقامات پر رہیں، غیر ضروری سفر سے گریز کریں اور کھلے آسمان تلے جانے سے اجتناب کریں۔

مزید برآں، عوام کو ہدایت دی گئی ہے کہ کسی بھی ہنگامی صورت حال میں پی ڈی ایم اے ہیلپ لائن 1129 پر فوری رابطہ کریں۔