ٹرمپ کی عرب و مسلم رہنماؤں سے ملاقات، غزہ میں جنگ کے بعد گورننس پر تجاویز پیش کریں گے

اردو ٹریبیون (لاہور ڈیسک)

امریکی صدر ڈونلڈ ٹرمپ آج اقوام متحدہ اجلاس کے موقع پر عرب اور مسلم ممالک کے رہنماؤں سے ملاقات کریں گے۔ امریکی میڈیا کے مطابق ٹرمپ اس ملاقات میں غزہ میں جنگ کے بعد کی گورننس اور امن سے متعلق تجاویز پیش کریں گے۔

رپورٹ کے مطابق امریکا چاہتا ہے کہ عرب اور مسلم ممالک غزہ میں فوج بھیجنے پر آمادہ ہوں تاکہ اسرائیل انخلا کرسکے۔ اس کے ساتھ ساتھ امریکا کی خواہش ہے کہ یہ ممالک فلسطین میں اقتدار کی منتقلی کے عمل اور تعمیرِ نو کے منصوبوں کے لیے مالی معاونت بھی فراہم کریں۔

اس ملاقات میں پاکستان، سعودی عرب، متحدہ عرب امارات، قطر، مصر، اردن، ترکیہ اور انڈونیشیا کے رہنما شریک ہوں گے۔ توقع ظاہر کی گئی ہے کہ گفتگو میں اسرائیلی انخلا سے متعلق اصول اور جنگ کے بعد غزہ میں ایسے نظامِ حکومت پر تبادلہ خیال ہوگا جس میں حماس کی مداخلت نہ ہو۔

یاد رہے کہ اس سے قبل وائٹ ہاؤس کی ترجمان کیرولین لیوٹ نے تصدیق کی تھی کہ امریکی صدر اقوام متحدہ اجلاس کے سائیڈلائن پر عالمی رہنماؤں سے ملاقاتیں کریں گے۔ ان میں اقوام متحدہ کے سیکرٹری جنرل انتونیو گوتریس کے ساتھ ملاقات بھی شامل ہے۔