نیو یارک: ٹرمپ کا مسلم رہنماؤں کو 21 نکاتی امن منصوبہ پیش

اردو ٹریبیون (لاہور ڈیسک)

امریکی صدر ڈونلڈ ٹرمپ نے اقوام متحدہ کی جنرل اسمبلی کے موقع پر مسلم ممالک کے سربراہان کو مشرق وسطیٰ اور غزہ کے لیے 21 نکاتی امن منصوبہ پیش کر دیا، جسے خطے میں قیام امن کی جانب ایک اہم پیش رفت قرار دیا جا رہا ہے۔

امریکا کے مشرق وسطیٰ کے لیے خصوصی ایلچی اسٹیو وٹکوف نے انکشاف کیا کہ صدر ٹرمپ نے یہ منصوبہ جنرل اسمبلی اجلاس کے سائیڈ لائن پر مسلم رہنماؤں کو پیش کیا ہے۔ وٹکوف کے مطابق امید ہے کہ آنے والے دنوں میں غزہ کے حوالے سے کوئی بڑا بریک تھرو سامنے آ سکتا ہے۔

خصوصی ایلچی نے مزید کہا کہ ایران سے بھی مذاکرات کی کوششیں جاری ہیں، تاہم تہران نے اس وقت سخت مؤقف اختیار کیا ہوا ہے، جبکہ امریکا بات چیت کے دروازے کھلے رکھنا چاہتا ہے۔

ذرائع کے مطابق نیویارک میں ہونے والی اس ملاقات میں وزیراعظم پاکستان شہباز شریف کے علاوہ ترکیہ، سعودی عرب، مصر، قطر، اردن، انڈونیشیا اور متحدہ عرب امارات کے سربراہان شریک تھے۔ ملاقات تقریباً 50 منٹ جاری رہی جس میں غزہ کی صورتحال، انسانی بحران اور خطے میں استحکام پر تفصیلی گفتگو ہوئی۔

بعدازاں صدر ٹرمپ نے میڈیا سے بات کرتے ہوئے کہا کہ مسلم رہنماؤں کے ساتھ یہ ملاقات انتہائی کامیاب رہی۔ ان کا کہنا تھا کہ “ہم نے غزہ اور مشرق وسطیٰ میں امن کے امکانات پر بہت تعمیری گفتگو کی ہے اور مجھے یقین ہے کہ یہ ملاقات نتائج خیز ثابت ہوگی۔”