امریکہ: سلینا گومز اور بینی بلانکو کی شاندار شادی کی تقریب

اردو ٹریبیون (لاہور ڈیسک)

معروف امریکی گلوکارہ سلینا گومز بالآخر میوزک پروڈیوسر بینی بلانکو کے ساتھ رشتہ ازدواج میں منسلک ہو گئیں۔ میڈیا رپورٹس کے مطابق شادی کی پررونق تقریب کیلیفورنیا کے علاقے ہوپ رینچ میں منعقد ہوئی جس میں تقریباً 170 مہمان شریک ہوئے۔

تقریب میں امریکی پاپ اسٹار ٹیلر سوئفٹ، گلوکار ایڈ شیئرن، پیرس ہلٹن اور اداکار اسٹیو مارٹن سمیت کئی ہالی ووڈ اسٹارز نے شرکت کی۔ سلینا گومز نے انسٹاگرام پر شادی کی تصاویر شیئر کیں جن میں وہ سفید لباس میں جبکہ بلانکو سیاہ ٹکسڈو میں نظر آ رہے ہیں۔

انسٹاگرام پوسٹ میں سلینا نے شادی کی تاریخ “9.27.25” درج کی جس پر بلانکو نے تبصرہ کیا: “میری حقیقی زندگی کی بیوی”۔ ووگ میگزین کے مطابق دلہا اور دلہن دونوں نے رالف لارین کے تیار کردہ ملبوسات پہنے۔

یاد رہے کہ سلینا گومز اور بینی بلانکو نے دسمبر 2023 میں اپنے تعلق کا اعلان کیا تھا اور ایک سال بعد منگنی کی تھی۔