اردو ٹریبیون (لاہور ڈیسک)
غزہ میں قابض اسرائیلی فوج کی جارحیت کا سلسلہ بدستور جاری ہے۔ صرف ایک روز میں مزید 53 فلسطینی شہید اور 16 بلند عمارتیں زمین بوس کر دی گئیں۔
غزہ شہری دفاع نے بتایا کہ اسرائیلی بمباری کے نتیجے میں گزشتہ روز 6 ہزار سے زائد فلسطینی بے گھر ہوئے اور رہائشی علاقوں کو براہِ راست نشانہ بنایا گیا۔
فلسطینی وزارتِ صحت کے مطابق اکتوبر 2023 سے جاری اسرائیلی حملوں میں شہدا کی تعداد 64 ہزار 871 تک پہنچ گئی جبکہ ایک لاکھ 64 ہزار 610 افراد زخمی ہو چکے ہیں۔
ادھر اسرائیل کے سابق آرمی چیف ہرزی حلیوی نے اعتراف کیا ہے کہ غزہ میں وحشیانہ حملوں کے نتیجے میں دو لاکھ سے زائد فلسطینی شہید یا زخمی ہوئے۔ ان کے مطابق غزہ کی 22 لاکھ آبادی میں سے 10 فیصد سے زائد لوگ ہلاک یا زخمی ہو چکے ہیں، جو انسانی المیے کی سنگین صورتحال کی عکاسی کرتا ہے۔
یہ اعداد و شمار اس بات کا ثبوت ہیں کہ غزہ میں اسرائیلی جارحیت نہ صرف جانی نقصان کا باعث بن رہی ہے بلکہ لاکھوں افراد کو بے گھر اور بنیادی ڈھانچے کو تباہ کر رہی ہے۔