اردو ٹریبیون (لاہور ڈیسک)
امریکی صدر ڈونلڈ ٹرمپ نے کہا ہے کہ قطر امریکا کا قریبی اور بہترین اتحادی ہے اور اسرائیل کو قطر کے حوالے سے محتاط رویہ اپنانا ہوگا۔ صحافیوں سے گفتگو میں ٹرمپ نے قطر کے امیر کو عظیم رہنما قرار دیا اور کہا کہ امریکا کے قطر کے ساتھ خاص تعلقات ہیں، لیکن اکثر لوگ اس بات کو نظر انداز کرتے ہیں۔
جب ان سے اسرائیلی حملوں کے تناظر میں سوال کیا گیا تو انہوں نے کہا کہ اسرائیل کو حماس کے خلاف ضرور اقدامات کرنے ہیں مگر قطر کے معاملے میں احتیاط برتنا ہوگی۔
اس کے ساتھ ہی امریکی صدر نے روس پر مزید پابندیاں لگانے کی تیاری کا بھی عندیہ دیا اور یورپی ممالک پر زور دیا کہ وہ امریکا کی پالیسی کے مطابق اقدامات کریں۔ ٹرمپ نے کہا کہ یورپ روس سے بڑی مقدار میں تیل خرید رہا ہے جبکہ امریکا نہیں چاہتا کہ یورپ روس پر توانائی کے لیے انحصار کرے۔ انہوں نے مزید کہا کہ بھارت پر بھی روس سے تیل کی خریداری پر بھاری ٹیرف عائد کیا جا چکا ہے۔