اردو ٹریبیون (لاہور ڈیسک)
اقوام متحدہ کی سلامتی کونسل نے قطر کے دارالحکومت دوحہ پر اسرائیلی فضائی حملے کی شدید مذمت کی ہے۔ برطانیہ اور فرانس کی جانب سے تیار کردہ اس بیان کو تمام 15 رکن ممالک بشمول امریکا نے منظور کیا۔
بیان میں اسرائیل کا براہِ راست ذکر کیے بغیر قطر کی خودمختاری اور علاقائی سالمیت کی حمایت کی گئی اور غزہ سے یرغمالیوں کی رہائی اور جنگ بندی کو اولین ترجیح قرار دیا گیا۔
بین الاقوامی میڈیا کے مطابق امریکا جو عموماً اقوام متحدہ میں اسرائیل کا تحفظ کرتا ہے، اس بار مذمتی بیان میں شامل ہو کر صدر ڈونلڈ ٹرمپ کی ناراضگی کا اظہار کر رہا ہے۔
اقوام متحدہ میں پاکستان کے مستقل مندوب عاصم افتخار نے اجلاس میں خطاب کرتے ہوئے کہا کہ اسرائیلی حملہ نہ صرف قطر بلکہ عالمی امن کے لیے خطرہ ہے۔ یہ اجلاس پاکستان سمیت متعدد ممالک کے مطالبے پر بلایا گیا۔
یاد رہے کہ اسرائیل نے دوحہ پر حملے میں حماس کی سیاسی قیادت کو نشانہ بنایا تھا، جس میں سینئر رہنما خلیل الحیا کے بیٹے اور دفتر کے ڈائریکٹر سمیت چھ افراد شہید ہوئے تاہم حماس کی قیادت محفوظ رہی۔