اردو ٹریبیون (لاہور ڈیسک)
اسلام آباد میں جاری مشترکہ اعلامیے کے مطابق پاکستان، اردن، متحدہ عرب امارات، انڈونیشیا، ترکیہ، سعودی عرب، قطر اور مصر نے امریکی صدر ڈونلڈ ٹرمپ کے مجوزہ امن منصوبے کی حمایت کی ہے۔
اعلامیے میں کہا گیا کہ اس منصوبے میں غزہ میں فوری جنگ بندی، انسانی امداد کی ترسیل، جبری بے دخلی کی روک تھام، غزہ کی تعمیر نو، مغویوں کی رہائی، اسرائیلی افواج کا مکمل انخلا اور دو ریاستی حل کے تحت ایک آزاد فلسطینی ریاست کے قیام کی راہ ہموار کرنے کا عزم شامل ہے۔
مسلم ممالک نے صدر ٹرمپ کی اس یقین دہانی کا خیر مقدم کیا کہ مغربی کنارے کے انضمام کی اجازت نہیں دی جائے گی اور فلسطینی عوام کے تحفظ کو یقینی بنایا جائے گا۔
وزرائے خارجہ نے کہا کہ وہ امریکا اور دیگر عالمی فریقین کے ساتھ مثبت اور تعمیری بات چیت کے لیے تیار ہیں تاکہ معاہدے کو حتمی شکل دی جا سکے اور اس پر مؤثر عملدرآمد یقینی بنایا جا سکے۔
اعلامیے میں اس عزم کا بھی اعادہ کیا گیا کہ یہ اقدامات بین الاقوامی قوانین کے مطابق ہیں اور خطے میں پائیدار امن، سلامتی اور استحکام کے لیے کلیدی حیثیت رکھتے ہیں۔