اردو ٹریبیون (لاہور ڈیسک)
نائب وزیراعظم اور وزیر خارجہ اسحاق ڈار نے کہا ہے کہ متعدد ممالک پاکستان کے ساتھ دفاعی معاہدے کرنے کے خواہاں ہیں۔ لندن میں پاکستانی ہائی کمیشن کے باہر میڈیا سے گفتگو میں ان کا کہنا تھا کہ پاکستان نے معرکہ حق میں اپنی دفاعی صلاحیت کو ثابت کیا ہے، اب وقت ہے کہ ملک کو معاشی طاقت بنایا جائے۔
انہوں نے کہا کہ پاکستان اور سعودی عرب کے درمیان دفاعی معاہدے سے دونوں ممالک کو فائدہ ہوگا اور کسی بھی ملک کو اس معاہدے پر کوئی تحفظات نہیں ہیں۔ اسحاق ڈار نے مزید کہا کہ کئی دیگر ممالک بھی پاکستان کے ساتھ اسی طرز پر معاہدے کرنا چاہتے ہیں۔
واضح رہے کہ 17 ستمبر کو اسلام آباد اور ریاض کے درمیان باہمی دفاعی معاہدہ طے پایا تھا جس کے تحت کسی بھی ایک ملک پر جارحیت کو دونوں ملکوں پر حملہ تصور کیا جائے گا۔