پاکستان: کولا نیکسٹ کے مالک اغوا,ایف آئی آر تاحال نہ کٹ سکی
کولا نیکسٹ کے مالک کو نامعلوم افراد نے اغوا کیا
کولا نیکسٹ کے مالک ذوالفقار احمد کو منگل کی شام ماڑی پور روڈ سے نقاب پوش مسلحہ افراد ڈبل کیبن گاڑی میں اغوا کر کے لے گئے۔ اہل خانہ نے سندھ ہائی کورٹ سے رجوع کرلیا۔
عینی شاہدین کے مطابق ذوالفقار احمد کی گاڑی کو کالے رنگ کے ویگو نے ماڑی پور پر موجود پولیس ٹریننگ سینٹر کے سامنے روکا۔ نقاب پوش افراد نے اسلحے کے زور پر کولا نیکسٹ کے مالک اور ان کے ساتھ موجود ان کے دوست قیصر کو گاڑی سے اتار کر ویگو میں بٹھا دیا۔
اغوا کاروں نے کچھ فاصلہ طے کرنے کے بعد ذوالفقار احمد کے دوست قیصر کو گاڑی سے اتار دیا۔ کولا نیکسٹ کے مالک کے اغوا کی درخواست کلری پولیس اسٹیشن میں جمع کروائی گئی تاہم پولیس نے ایف آئی آر درج نہیں کی، اہل خانہ کا کہنا ہے کہ تین دن گزر جانے کے بعد بھی ایف آئی آر نہیں کاٹی گئی، جس کے بعد اہل خانہ نے عدالت سے رجوع کرلیا ہے۔
یاد رہے کہ کولا نیکسٹ پاکستان کے ایک بڑے گروپ یعنی میزان آئل کا حصہ ہے۔
