یونانی جزیرہ کوس میں مہاجرین کی ایک اور کشتی کو حادثہ، 4 افراد ہلاک
یونان کے جزیرے کوس میں ترکیہ سے یونان داخل ہوتے ہوئے تارکینِ وطن کی ایک کشتی کو حادثہ پیش آیا، کشتی پر مردہ خواتین اور بچے سوار تھے۔
یونانی کوسٹ گارڈ کی تحقیقات جاری ہیں ● 27 کو بچا لیا گیا ● دو خواتین اور دو چھوٹے لڑکے بے ہوش برآمد، کشتی پر 31افراد سوار تھے
ایتھنز (خالد مغل) کل رات یونان ترکیہ کی سمندری حدود ایجیئن کے پانیوں میں ایک اور سانحہ ریکارڈ کیا گیا، جس کا شکار مہاجرین – تارکین وطن تھے۔
مشرقِ وسطہ میں اسرائیل اور لبنان کی جنگ کے نتیجے میں یونان میں مہاجرین کی آمد میں اضافہ دیکھنے میں آ رہا ہے۔
کوسٹ گارڈ کی معلومات کے مطابق ترکیہ کے ساحل سے آنے والی ایک کشتی کوس میں آئیوس فوکاس کے ساحل کے قریب سمندری علاقے میں الٹ گئی۔
ذرائع کے مطابق 27 افراد کو بچا لیا گیا، جب کہ چار افراد کو بے ہوشی کی حالت میں نکال لیا گیا۔ جن میں دو خواتین اور دو چھوٹے لڑکے شامل ہیں، جن کی عمریں دو سے چار سال بتائی جاتی ہیں۔ زندہ بچ جانے والوں کے مطابق کشتی پر مزید دیگر افراد سوار نہیں تھے۔
تاہم، یونانی کوسٹ گارڈ کے تین جہازوں اور ایک پرائیویٹ بحری جہاز کی شرکت کے ساتھ علاقے میں مزید افراد کیلئے تلاش جاری ہے۔ موسم کی صورتحال کو ساز گار بتایا جاتا ہے۔
