یونان: دارالحکومت ایتھنز میں 12 ربیع الاول، عید میلاد النبیﷺ کے موقع پر جلوس برآمد کیا گیا۔
یونان میں عید میلاد النبی صلی اللہ علیہ وآلہ وسلم نہایت عقیدت و احترام اور مذہبی جوش و خروش کے ساتھ منایا گیا۔
ایتھنز (ڈیسک) اس موقع پر دارالحکومت ایتھنز میں سالانہ جلوس کا اہتمام کیا گیا۔ جلوس ایتھنز کے مرکز پلاتیہ کوجیا سے برآمد ہو کر ایتھنز کی مرکزی شاہراہوں سے گزرتا ہوا اپنے اختتامی مقام پلاتیہ کومودورو پر اختتام پزیر ہوا۔
جلوس میں سینکڑوں کی تعداد میں عاشقان مصطفٰی صلی اللہ علیہ وسلم نے کثیر تعداد میں شرکت کی۔
جلوس میں شامل سینکڑوں افراد نے ہاتھوں میں سبز جھنڈے اور بینزز اٹھا رکھے تھے جن پر نبی رحمت حضرت محمد مصطفی صلی اللہ علیہ وسلم سے والہانہ محبت کے نعرے درج تھے اور جلوس میں نعرہ تکبیر اور نعرہ رسالت کی صدائیں گونجتی رہیں۔
یونان میں تمام پاکستانی مذہبی جماعتوں نے آقا ﷺ کے اس جلوس میں شرکت کی۔ اس کے علاوہ یونان میں مقیم پاکستانی کمیونٹی کی سیاسی سماجی کاروباری شخصیات سمیت صحافی برادری نے بھی بڑی تعداد میں بھرپور شرکت کی۔
جلوس ایتھنز کی مرکزی شاہراہوں سے گزرتا ہوا جب اپنے مقررہ مقام پر پہنچا تو ثناء خوانوں نے نبی پاک صلی اللہ علیہ وسلم کی شان میں ہدیہ عقیدت کے پھول نچھاور کئے۔
جلوس کے شرکاء کیلئے سبیلیں، کھانے اور دیگر اشیاء کے مفت اسٹالز لگائے گئے تھے اور جلوس میں بہترین نظم و ضبط دیکھنے میں آیا۔
جلوس کے اختتام پر مختلف مذہبی تنظیموں کی نمائندگی کرتے ہوئے چوہدری شبیر احمد دھامہ، ارسلان خرم چیمہ، سید رضوان شاہ عطاری، علامہ یاسین قادری، چوہدری عتیق الرحمٰن اور حافظ شاہد غفار نے جلوس میں آنے والے افراد کا شکریہ ادا کیا۔
