متحدہ عرب امارات: دبئی انٹرنیشنل ائیرپورٹ نے سال 2024 کے پہلے 6 ماہ میں گزشتہ سال کے مقابلے میں 8 فیصد سے زائد مسافروں کا خیر مقدم کیا
بھارت 61 لاکھ مسافروں کے ساتھ دبئی انٹرنیشنل ایئرپورٹ کی سب سے اہم منزل ہے
دبئی نیوز ایجنسی (اے پی پی) دبئی انٹرنیشنل ایئرپورٹ نے 2024 کی پہلی ششماہی میں 4 کروڑ 49 لاکھ مسافروں کا خیرمقدم کیا جو گزشتہ سال کے مقابلے میں 8 فیصد زائد ہے۔ متحدہ عرب امارات کی نیوز ایجنسی ’’وام‘‘ کے مطابق یہ ریکارڈ اضافہ اہم منڈیوں کی جانب سے بڑھتی ہوئی مانگ اور چین جیسی منڈیوں کے دوبارہ فعال ہونے کے باعث ہوا ہے۔ ایئرپورٹ کے سی ای او پال گرفتھس کے مطابق دبئی انٹرنیشنل ایئرپورٹ رواں سال 9 کروڑ 18 لاکھ مسافروں کی آمد کے ساتھ نئے ریکارڈ قائم کرنے کی راہ پر گامزن ہے۔
ایئرپورٹ 106 ممالک کے 269 شہروں سے منسلک ہے اور 101 بین الاقوامی ایئرلائنز یہاں اپنی خدمات فراہم کرتی ہیں
بھارت 61 لاکھ مسافروں کے ساتھ دبئی انٹرنیشنل ایئرپورٹ کی سب سے اہم منزل ہے جس کے بعد سعودی عرب، برطانیہ اور پاکستان اس فہرست میں شامل ہیں۔ یہ ایئرپورٹ 106 ممالک کے 269 شہروں سے منسلک ہے اور 101 بین الاقوامی ایئرلائنز یہاں اپنی خدمات فراہم کرتی ہیں۔ پروازوں کی کل تعداد 2 لاکھ 16 ہزار تک پہنچ گئی ہے، جو پچھلے سال کی پہلی ششماہی کے مقابلے میں 7.2 فیصد زیادہ ہے۔
