ماسکو: ہندوستانی جلد ہی ملک واپس آئیں گے، صدر ولادیمیر پوتن
نومبر 2023 سے روس اوریوکرین سرحد پر تقریباً 18 ہندوستانی پھنسے ہوئے ہیں۔
ماسکو: وزیر اعظم مودی اس وقت روس میں موجود ہیں، جوکہ صدر ولادیمیر پوتن کی دعوت پر وہاں پہنچے ہیں۔ وزیر اعظم مودی کورونا کے بعد پہلی بار روس گئے ہیں اور دونوں لیڈران کی ملاقات کو انتہائی اہم قرار دیا جا رہا ہے۔ رپورٹ کے مطابق، روسی دورے پر گئے وزیر اعظم نریندر مودی نے صدر ولادیمیر پوتن سے روسی فوج میں کام کرنے والے ہندوستانیوں کی وطن واپسی کے معاملہ پر گفتگو کی۔ اس کے بعد صدر پوتن نے پی ایم مودی سے کہا کہ ہندوستانی جلد ہی ملک واپس آئیں گے۔
اس سے قبل کی رپورٹس میں انکشاف ہوا تھا کہ ہندوستانی شہریوں کو روسی فوج کے ساتھ مل کر یوکرین کے خلاف لڑنے پر مجبور کیا جا رہا ہے۔ ہندوستانیوں کو دھوکہ دہی سے سرحد پر سیکورٹی معاون کے طور پر کام کرنے کے لیے بھیجا جا رہا ہے۔ ’دی ہندو‘ نے اپنی رپورٹ میں کہا تھا کہ ایک ایجنٹ نے اطلاع دی تھی کہ نومبر 2023 سے روس اور یوکرین سرحد پر تقریباً 18 ہندوستانی پھنسے ہوئے ہیں۔ اس دوران ایک شخص کی موت بھی ہوئی ہے۔ اتر پردیش، گجرات، پنجاب اور جموں و کشمیر کے کئی نوجوان بھی اس جنگ میں پھنس گئے ہیں۔
