دہلی : ہوائی اڈے کے ٹرمینل کی چھت گرنے سے ایک شخص ہلاک آٹھ زخمی ہوگئے

وجوہات کا اندازہ لگایا جا رہا ہے لیکن اس کی بنیادی وجہ گزشتہ چند گھنٹوں سے جاری موسلا دھار بارش ہے، ترجمان ائرپورٹ

دہلی ہوائی اڈے کے ٹرمینل کی چھت گرنے سے ایک شخص کی موت ہو گئی اور آٹھ دیگر زخمی ہو گئے۔ دیلی ہوائی اڈے کے ٹرمینل 1 کے ساتھ کھڑی گاڑیوں کی چھت کو سہارا دینے والے بڑے ستون گرنے سے چھت نیچے گر گئی۔ دہلی انٹرنیشنل ایئر پورٹ لمیٹڈ کے حکام نے کہا کہ حادثے کی وجوہات کی تحقیقات کے لئے ایک تکنیکی کمیٹی تشکیل دی گئی ہے۔

ایئرپورٹ حکام کا کہنا ہے کہ ٹرمینل سے تمام پروازیں تاحکم ثانی معطل کردی گئی ہیں۔

کچھ ایئرلائنز نے ہوائی اڈے کے بقیہ دو ٹرمینلز پر فلائٹ آپریشن منتقل کردیا ہے۔

ہوائی اڈے کے ایک ترجمان نے بتایا کہ گرنے کی وجوہات کا اندازہ لگایا جا رہا ہے لیکن اس کی بنیادی وجہ گزشتہ چند گھنٹوں سے جاری موسلا دھار بارش ہے۔ عہدیداروں نے بتایا کہ اس واقعے میں چار گاڑیوں کو نقصان پہنچا اور آٹھ افراد کو معمولی چوٹیں آئیں۔