بھارت میں ٹرینوں کے تصادم سے 15 اموات، متعدد زخمی ہوگئے
بھارتی ریاست مغربی بنگال میں مال بردار ٹرین سٹیشن پر کھڑی مسافر ٹرین سے ٹکرا گئی جس میں سوار 15 افراد جان بحق اور درجنوں زخمی ہو گئے۔
پولیس نے بتایا کہ حادثے کی وجہ ریلوے حکام کی جانب سے سگنل کی لاپرواہی تھی۔ بھارتی میڈیا پر نشر ہونے والی تصاویر میں مال گاڑی کی بوگیاں بکھری ہوئی دیکھی جا سکتی ہیں، جب کہ مسافر گاڑی کی متاثرہ آخری بوگی ٹکر سے عمودی طور پر فضا میں بلند ہو گئی۔
یہ حادثہ سگنلنگ کی غلطی کی وجہ سے انڈیا کے بدترین ریل حادثے کے صرف ایک سال بعد پیش آیا ہے، ضلع دارجلنگ کے ایک سینیئر پولیس اہلکار ابھیشیک رائے نے بتایا کہ تباہ شدہ بوگیوں میں سے کم از کم 15 لاشیں نکالی گئیں۔ انہوں نے مزید کہا کہ حادثے میں تقریباً 30 افراد زخمی ہوئے۔ پولیس اور نیشنل ڈیزاسٹر رسپانس فورس کی امدادی ٹیموں نے ڈاکٹروں اور علاقے کے رہائشیوں کے ساتھ مل کر ملبے کے نیچے سے لوگوں کو نکالا گیا
حکام کے مطابق مال بردار ٹرین نے شمال مشرقی ریاست تریپورہ سے مغربی بنگال کے دارالحکومت کولکتہ جانے والی کنچن جنگا ایکسپریس کو ٹکر ماری جس سے مسافر ٹرین کی تین بوگیاں پٹری سے اتر گئیں تاہم فوری طور پر یہ واضح نہیں ہو سکا کہ اس وقت ٹرین میں کتنے مسافر سوار تھے۔ جبکہ امدادی کارکنوں نے لوہے کی سلاخوں اور رسیوں کا استعمال کرتے ہوئے مسافر ٹرین کی ایک بوگی کو مال گاڑی کے انجن کی چھت پر چڑھ جانے والی بوگی کو نیچے اتارا گیا۔ بھارتی ریلوے نیٹ ورک بورڈ کی سربراہ جیا ورما سنہا نے میڈیا کو بتایا کہ حادثہ اس وقت پیش آیا جب مال بردار ٹرین کے ڈرائیور نے سگنل کو نظر انداز کیا اور مال گاڑی پوری رفتار سے ایکسپریس ٹرین کی پچھلی بوگیوں سے ٹکرا گئی۔مرنے والوں میں مال بردار ٹرین کا ڈرائیور اور مسافر ٹرین کا ایک گارڈ بھی شامل ہے۔
