آئی سی سی ٹی20 ورلڈ کپ 2024ء کا 30واں اور گروپ اے میں امریکا اور آئرلینڈ کا اہم ترین بارش کی وجہ سے منسوخ کردیا گیا۔
امریکا اور آئرلینڈ کا میچ بلا نتیجہ ختم ہونے کے بعد پاکستان کرکٹ ٹیم کا میگا ایونٹ سے واپسی کا ٹکٹ کٹ گیا ، امید کی کرن بھی بارش کے پانی سے بجھ گئی، پاکستان کرکٹ ٹیم کا ٹی20 ورلڈ کپ 2024 میں سفر ختم ہوگیا۔
پہلے میچ میں امریکا نے ہرایا، ڈیلس میں جہاں دنیا کا بہترین بولنگ اٹیک کی دعوی دار ٹیم 159 رنز کا دفاع کرنے میں ناکام رہی
امریکا اور آئرلینڈ کا میچ بارش کی نذر کیا ہوا، تمام پاکستانیوں کا چہرہ اتر گیا، میگا ایونٹ میں ٹیم پاکستان کی کہانی 3 میچز کھیل کر ہی تمام ہوگئی ، لاڈر ہل میں بارش کا پانی پاکستان ٹیم امیدوں کا بہا کر لے گیا، امریکا کی ٹیم گروپ اے سے بھارت کے ساتھ سپر ایٹ مرحلے میں پہنچ گئی، اب پاکستان کا آئرلینڈ سے اتوار کو ہونے والا میچ رسمی کارروائی بن کر رہ گیا اوربارش کے باعث دونوں ٹیموں کو میچ کا ایک ایک پوائنٹ دے دیا گیا۔
ایک پوائنٹ ملتے ہی امریکا کی ٹیم سپر ایٹ مرحلے میں پہنچ گئی جبکہ پاکستان کیلئے اگر مگر کے ساتھ سپر ایٹ مرحلے میں داخلے کے تمام راستے بند ہو گئے۔ گروپ اے میں سے بھارت اور امریکا کی ٹیموں نے سپر 8 مرحلے کے لیے کوالیفائی کر لیا ہے، پاکستانی ٹیم پہلی بار ٹی ٹوئنٹی ورلڈ کپ کے دوسرے مرحلے میں جگہ نہیں بنا سکی۔
پاکستانی ٹیم اپنا آخری گروپ میچ 16 جون کو آئر لینڈ کے خلاف کھیلے گی۔
پاکستانی ٹیم نے 2007 اور 2009 کے ٹی ٹوئنٹی ورلڈ کپ کے فائنل میں جگہ بنائی، 2010 اور 2012 کے ورلڈ کپ میں بھی پاکستان نے سیمی فائنل تک رسائی حاصل کی۔2021 کے ٹی ٹوئنٹی ورلڈ کپ میں پاکستان نے سیمی فائنل اور 2022 کے ورلڈ کپ میں فائنل میں جگہ بنائی۔
