- پنجاب میں انسداد دہشتگردی کے ادارے (سی ٹی ڈی) اور پولیس نے مشترکہ آپریشن کے دوران بہاولپور میں ایک بڑے تخریبی منصوبے کو ناکام بنا دیا۔ خفیہ اطلاع پر کی گئی اس کارروائی میں ایک انتہائی مطلوب دہشتگرد کو فائرنگ کے تبادلے میں ہلاک کر دیا گیا، جبکہ اس کے تین ساتھی فرار ہو گئے۔
سی ٹی ڈی کے ترجمان کے مطابق ہلاک ہونے والا دہشتگرد کالعدم تنظیم “فتنہ ہندوستان” سے تعلق رکھتا تھا، اور وہ بہاولپور میں کسی بڑی دہشتگردی کی منصوبہ بندی کر رہا تھا۔ دہشتگردوں کے قبضے سے بڑی تعداد میں گولیاں، ہینڈ گرنیڈ، اور حساس دھماکہ خیز مواد برآمد کیا گیا، جو عوامی مقامات پر حملے کے لیے استعمال ہونا تھا۔
ترجمان کا کہنا ہے کہ کارروائی کے بعد دہشتگردی، قتل، اور دھماکہ خیز مواد رکھنے کے الزامات کے تحت مقدمہ درج کر لیا گیا ہے، جبکہ فرار ہونے والے دہشتگردوں کی تلاش کے لیے مختلف علاقوں میں چھاپے مارے جا رہے ہیں۔ مزید تفتیش جاری ہے۔
حکام کا کہنا ہے کہ اگر یہ آپریشن بروقت نہ کیا جاتا، تو ایک بڑا سانحہ رونما ہو سکتا تھا۔ شہری حلقوں میں سی ٹی ڈی کی کارروائی کو سراہا جا رہا ہے، جس نے ممکنہ تباہی کو روک دیا۔