دنیا کا سب سے بڑا یوتھ فٹبال ایونٹ ناروے کپ 2025 رواں سال 26 جولائی سے 2 اگست تک ناروے کے دارالحکومت اوسلو میں منعقد ہو رہا ہے، جس میں 30 سے زائد ممالک کی 2,000 سے زیادہ ٹیمیں شرکت کریں گی۔ پاکستان کی نمائندگی اس بار بھی مسلم ہینڈز ایف سی کے نام سے کھیلنے والی اسٹریٹ چائلڈ فٹبال ٹیم کرے گی، جو عالمی سطح پر اپنی پہچان بنا چکی ہے۔
یہ ٹیم اُن بچوں پر مشتمل ہے جو مسلم ہینڈز کے معروف ‘میدان’ پروگرام کے تحت فٹبال کی باقاعدہ تربیت حاصل کرتے ہیں۔ اس پروگرام کا مقصد نہ صرف کھیل کے ذریعے بچوں کی شخصیت سازی اور تعلیم کو فروغ دینا ہے بلکہ ان کے لیے ایک روشن اور محفوظ مستقبل کی بنیاد رکھنا بھی ہے۔
پاکستانی ٹیم نے گزشتہ برسوں میں شاندار کارکردگی کا مظاہرہ کیا، جن میں 2023 میں چاندی کا تمغہ اور 2024 میں چوتھی پوزیشن حاصل کرنا شامل ہے۔ اس وقت ٹیم اسلام آباد اسپورٹس کمپلیکس میں بھرپور تیاریوں میں مصروف ہے تاکہ ناروے کپ میں ایک بار پھر پاکستان کا پرچم سربلند کر سکے۔
ناروے کے بعد یوکے کا کنفرمڈ دورہ – ایک اور تاریخی موقع
ناروے کپ کے فوراً بعد ٹیم یوکے (برطانیہ) کے دورہ پر روانہ ہوگی، جہاں پہلی مرتبہ پاکستان کی کوئی ٹیم پریمیئر لیگ کی ٹیموں سے مقابلہ کرے گی۔۔ اس دورے کے دوران ٹیم نہ صرف انگلینڈ کے معروف فٹبال کلبز کا دورہ کرے گی بلکہ نوجوان کھلاڑیوں کے لیے خصوصی تربیتی سیشنز، دوستانہ میچز، اور اکیڈمی لیول پر انٹرنیشنل تجربہ حاصل کرنے کے مواقع بھی میسر آئیں گے۔
یہ غیرمعمولی موقع ٹیم کے نوجوان اسٹارز کے لیے بین الاقوامی فٹبال دنیا کے دروازے کھولنے کے مترادف ہے، جو نہ صرف ان کی شخصیت سازی بلکہ پاکستان کے مثبت اور پُرامن تشخص کو بھی عالمی سطح پر اجاگر کرے گا۔
قابل ذکر بات یہ ہے کہ یہ ٹیم وزیراعظم یوتھ پروگرام اور مسلم ہینڈز کی مشترکہ کاوش کا نتیجہ ہے، جس کے تحت ملک بھر سے نوجوان ٹیلنٹ کو تلاش کرنے کے لیے مختلف شہروں میں ٹریننگ کیمپس کا انعقاد کیا گیا۔ ان کیمپس کے ذریعے بہترین کھلاڑیوں کا انتخاب کر کے فائنل اسکواڈ تشکیل دیا گیا، جس میں چاروں صوبوں کی نمائندگی کو یقینی بنایا گیا ہے۔
مسلم ہینڈز کا ‘میدان’ پروگرام بچوں کو نہ صرف بین الاقوامی سطح پر آگے بڑھنے کا موقع فراہم کر رہا ہے بلکہ ایک محفوظ، پُرامن اور خودمختار مستقبل کی راہ بھی ہموار کر رہا ہے۔