اردو ٹریبیون (لاہور ڈیسک)
یورپ کے مختلف شہروں میں اسرائیلی افواج کی جانب سے گلوبل صمود فلوٹیلا پر حملے کے بعد بڑے پیمانے پر احتجاجی مظاہرے پھوٹ پڑے۔ ان مظاہروں میں فلسطین کے حامی کارکنان، طلبہ اور یونینز کے ارکان بڑی تعداد میں شریک ہوئے۔
ترک خبر رساں ادارے انادولو کے مطابق اٹلی کے دارالحکومت روم میں سیکڑوں مظاہرین نے ٹرمنی اسٹیشن کے قریب پیاچا دی چیونکوینتو پر جمع ہو کر اسرائیل کے خلاف نعرے لگائے اور فلسطینی عوام کے ساتھ اظہارِ یکجہتی کیا۔ مظاہرین نے امدادی قافلے پر حملے کو بین الاقوامی قوانین کی سنگین خلاف ورزی قرار دیا۔
اسی طرح اسپین کے شہر بارسلونا میں سیکڑوں افراد نے اسرائیلی قونصلیٹ کے باہر احتجاج کیا جبکہ جرمنی کے دارالحکومت برلن میں درجنوں افراد مرکزی ریلوے اسٹیشن پر جمع ہوئے۔ بیلجیم کے دارالحکومت برسلز میں بھی بڑی احتجاجی ریلی نکالی گئی جو پلاس دی لا بورس سے وزارتِ خارجہ تک پہنچی۔
مظاہرین کا کہنا تھا کہ اسرائیلی اقدام انسانی ہمدردی کی کوششوں پر براہِ راست حملہ ہے اور عالمی برادری کو چاہیے کہ فوری طور پر فلسطین کے مظلوم عوام کی مدد کے لیے عملی اقدامات کرے۔