اردو ٹریبیون (لاہور ڈیسک)
فلپائن کے وسطی ساحلی علاقے میں 6.9 شدت کے زلزلے نے خوفناک تباہی مچادی۔ غیر ملکی میڈیا رپورٹس کے مطابق مختلف حادثات میں 60 افراد ہلاک جبکہ 150 زخمی ہوگئے۔
امریکی جیولوجیکل سروے کے مطابق زلزلہ مقامی وقت کے مطابق رات 10 بجے آیا، جس کی گہرائی 10 کلو میٹر اور مرکز بوگو شہر کے شمال مشرق میں 17 کلو میٹر کے فاصلے پر تھا۔ زلزلے کے بعد متعدد آفٹر شاکس بھی محسوس کیے گئے، جس پر لوگ خوفزدہ ہو کر گھروں سے باہر نکل آئے۔
رپورٹس کے مطابق کئی عمارتیں زمین بوس ہوگئیں، باسکٹ بال میچ کے دوران ایک اسپورٹس کمپلیکس گر گیا، جبکہ گرجا گھروں، پلوں اور سڑکوں کو بھی شدید نقصان پہنچا۔
حکام نے سیبو میں ایمرجنسی نافذ کرتے ہوئے اسکولز اور سرکاری دفاتر بند کرنے کا اعلان کردیا ہے۔ ملبے تلے دبے افراد کو نکالنے کے لیے ریسکیو آپریشن جاری ہے اور بھاری مشینری روانہ کر دی گئی ہے۔
ڈیزاسٹر منیجمنٹ حکام کے مطابق بجلی اور مواصلاتی نظام متاثر ہوا ہے، جس سے امدادی سرگرمیوں میں مشکلات پیش آرہی ہیں۔ متاثرہ علاقوں میں پانی، ادویات اور دیگر ضروری سامان بھیجا جا رہا ہے، جبکہ ہلاکتوں میں اضافے کا خدشہ ظاہر کیا جا رہا ہے۔