اردو ٹریبیون (لاہور ڈیسک)
ایرانی سپریم نیشنل سکیورٹی کونسل کے سیکرٹری علی لاری جانی نے مسلمان ممالک پر زور دیا ہے کہ وہ اسرائیل کے خلاف ایک مشترکہ آپریشن روم تشکیل دیں تاکہ صیہونی حکومت کے خلاف عملی اقدامات کیے جا سکیں۔
اپنے بیان میں علی لاری جانی نے کہا کہ محض تقاریر اور اجلاسوں سے اسرائیلی حکومت کو کوئی نقصان نہیں پہنچے گا۔ انہوں نے واضح کیا کہ فلسطین کے مظلوم عوام کے لیے آواز اٹھانے کے ساتھ ساتھ عملی قدم اٹھانا ناگزیر ہے۔
ان کا کہنا تھا کہ اگر مسلم ممالک نے فلسطین کے حق میں کچھ نہ کیا تو کم از کم اپنی سلامتی اور خودمختاری کے تحفظ کے لیے فیصلہ کن اقدامات کریں، ورنہ اسرائیلی حکومت نہ صرف فلسطین بلکہ پورے خطے کے امن کے لیے خطرہ بن جائے گی۔
لاری جانی نے کہا کہ مشترکہ آپریشن روم قائم کرنا ایک مثبت اور مؤثر قدم ہوگا جس سے فلسطینی عوام کی مدد ممکن ہو سکے گی اور خطے میں طاقت کا توازن قائم رہے گا۔